*चंद्रपूर जिल्ह्यात महिलांमध्ये वाढते खर्रा सेवन – चिंतेचा विषय*
*कामाचा ताण, सवय की अज्ञान? – तंबाखूजन्य पदार्थांनी महिलांच्या आरोग्यावर घाला*
चंद्रपूर जिल्हा हा औद्योगिक, शैक्षणिक आणि सांस्कृतिक दृष्ट्या प्रगतीकडे वाटचाल करणारा जिल्हा म्हणून ओळखला जातो. मात्र या प्रगतीसोबत काही सामाजिक विकृतीही वाढताना दिसत आहेत. त्यापैकी एक गंभीर बाब म्हणजे महिलांमध्ये वाढत चाललेले खर्रा सेवन. पूर्वी पुरुषांपुरती मर्यादित असलेली ही सवय आता महिलांमध्येही झपाट्याने वाढताना दिसत आहे, ही अत्यंत चिंताजनक बाब आहे.
खर्रा हा केवळ एक व्यसन नसून तो आरोग्यासाठी घातक विष आहे. तोंडाचा कर्करोग, दात व हिरड्यांचे आजार, पचनसंस्थेचे विकार यांसारख्या गंभीर आजारांना तो निमंत्रण देतो. महिलांमध्ये ही सवय वाढल्याने त्यांच्या स्वतःच्या आरोग्यावर परिणाम होतोच, पण कुटुंबाच्या आरोग्यावर आणि पुढच्या पिढीवरही त्याचे दुष्परिणाम होतात. घरातील लहान मुलांवर आईचे अनुकरण करण्याची प्रवृत्ती असते. त्यामुळे ही सवय नकळत पुढच्या पिढीतही पोहोचण्याचा धोका निर्माण होतो.
या मागची कारणेही समजून घेणे गरजेचे आहे. बदलती जीवनशैली, कामाचा ताण, चुकीची मैत्री, सहज उपलब्धता आणि व्यसनाकडे आकर्षित करणाऱ्या जाहिराती यामुळे महिलाही या विळख्यात अडकत आहेत. काही ठिकाणी तर सार्वजनिक ठिकाणी महिलांकडून उघडपणे खर्रा सेवन करताना दिसते, ही सामाजिक दृष्ट्या लाजिरवाणी बाब आहे.
यावर केवळ टीका करून चालणार नाही तर ठोस उपाययोजना करणे आवश्यक आहे.
शाळा-महाविद्यालयांमध्ये जनजागृती, आरोग्य विभागाने विशेष मोहिमा, महिला बचत गटांमार्फत व्यसनमुक्तीचे अभियान आणि खर्रा विक्रीवर कठोर नियंत्रण या गोष्टी तातडीने राबविणे गरजेचे आहे. कुटुंबानेही प्रेमाने समजावून सांगून महिलांना या व्यसनापासून दूर ठेवण्याची जबाबदारी घ्यावी.
महिला ही कुटुंबाचा केंद्रबिंदू असते. तिचे आरोग्य चांगले असेल तरच कुटुंब आणि समाज निरोगी राहतो. त्यामुळे चंद्रपूर जिल्ह्यात वाढत चाललेली महिलांची खर्रा सेवनाची सवय ही केवळ वैयक्तिक नाही तर सामाजिक चिंतेचा विषय आहे. वेळेत जागे होऊन यावर नियंत्रण मिळवणे हीच आजची खरी गरज आहे.
